關於運動之二三事

對舊 La Sportiva Solution 已經穿哂窿，終於買咗對新嘅。諗諗吓，我呢兩年半花喺攀石上嘅錢，都已經拍得住過去廿幾年踢波所花嘅錢。畢竟攀石鞋比波 boot 貴，而且攀石場要收費，而踢波去街場跟隊就可以。

但我覺得係值得。當你好鍾意一項運動、好想喺呢項運動上取得一啲成果，咁你唔可以等、唔可以慳。等咩？好多人都話要做運動㗎，但最後一日推一日。跑步嫌熱，等冇咁熱先去跑；慳咩？去 gym 房有冷氣又嫌貴「等我搵多啲錢，第日升咗職大把時間去做運動啦！」事實係，你唔會。唔係話你冇得升（實際可能性亦唔低），而係你將來就算真係有時間，我都肯肯定你唔會拎去做運動。因為你冇火。

咁點解一定要買咁貴嘅用品？其實唔駛。我買對幾千蚊波 boot 唔通又會出到衝力射球咩？有啲人又以為買對幾千蚊拳套就打到好似泰臣咁。其實只係得個樣。我話唔慳得嘅意思係，你要捨得買一啲適合你 level 嘅用具。除非你係比利，唔係你著百飯魚踢英超畀我睇丫？我兩年半前開始攀石，買咗對兩百蚊港紙嘅攀石鞋就走去攀。一星期攀四晚，全年無休。對鞋攀到穿哂我先買第二對。

一開始係進步得好快。然後過咗幾個月，發覺有啲動作做唔到，例如 heel hook，即係用腳錚勾住個把手。最後發現係鞋嘅問題，因為攀石鞋 beginner 同 advanced 嘅設計差好遠。鞋錚冇特別設計個 heel cup 係冇可能做到 heel hook。著對 beginner 做呢類動作不如赤腳仲好。之後買咗對  La Sportiva Futura，哇屌，正呀喂！而家就進化到好似啲攀石老手咁只愛 Solution。個 heel cup design 真係冇得頂，係專門設計 for indoor bouldering。

另一樣我想講嘅就係態度。你要專注去做一項運動，先有可能會進步。但其實專注唔單止係講緊有耐性、持續去做，而係你做運動嘅時間要用腦諗吓，究竟點先可以做得好。同人講攀石，十個有九個以為係用手力去攀。錯哂啦。等於話踢波只係大大力踢落個波度咁。其實好多運動係講全身肌肉協調，攀石係非常非常著重手、腳、core 嘅力量互相配合。唔明？即係你唔扭腰點斬波呀？跑個步都要 fing 對手啦。如果再唔明，你都係返去打 winning 算吧啦。

所以我係好強調，攀石其實係要練習 footwork。有好嘅 footwork 會幫到非常之多。特別係某啲動作， footwork 做得唔好可以講係完全冇機會做得到。以上其實你問一啲攀石新手老手都會係咁講。但我發現，有啲人係將「要用腳協助」呢個概念做到走火入魔。例如好多人，特別係女仔，都會好鍾意係又 hook 唔係又 hook。我都費事理。喂大佬，好明顯你係唔明白呢項運動其實係需要你將個重心由低運送去高處嘅運動，你 hook 到隻腳咁高冇錯係好勁，但問題係你個重心咪低咗囉，咁你咪更加難伸手上去囉。

另一個問題就係，好多人覺得一條線（即係一個攀石問題）有 model answer。特別係香港人。唔知係咪關香港人讀書考試習慣有 model answer 事。你去踢波都唔係踢死一個陣啦。有次我返香港玩，有條線係 overhang，我覺得可以 hook 住慢慢攀，但最後都係就咁 campus（即係唔用腳，只用手吊起個人）算數。點知有個人竟然同我講：「唔係咁玩㗎！」哇我心諗，你咁撚冇創意嘅？攀石目的就係完成條線，我話知你中間點做，只要冇犯規就得啦（特別係 bouldering 抱石，近乎冇規則）。駛唔駛隊隊波都踢到巴塞咁先畀射個波入龍門呀？做運動其實可以幫你訓練腦筋，特別係一啲好似攀石咁著重 problem solving 嘅運動。

最後其係都係嗰句，要 keep 住持續咁做。碧咸以前都係日日練先做到咁完美嘅七旋斬咋！見啲人報個渣打全馬，比賽前一日先落運動場跑兩個圈再去食宵，真係冇嘢好講。

運動同其他事情都係，要有恆心，到最後先有可能有結果。

完！